KUCHING: Kaban Kunsil Nengeri (ADUN) Engkilili Dr Johnical Rayong Ngipa udah masuk parti komponen BN, ianya parti SUPP. Nitihka Seketri Besai Parti Sa’ati Rayat Sarawak (SUPP) Senator Datuk Sim Kheng Hui, kaban komiti ari pampang Engkilili nadai mantah lebuh Rayong tama lalu dichalunka nyadi pengari ba pengawa bepilih besai nengeri Sarawak ke deka datai.
“Ba aum ke diatur tadi (kemari), semua kaban komiti ari pampang Engkilili madahka sida nadai mantah lebuh Rayong dichalunka betanding ba pengawa bepilih ke deka datai.
“Endang amat suba rayat enda setuju Rayong bediri ngarika BN maya bepilih taun 2006, tang laban pemujur sereta pemanah iya bejalaika tanggung pengawa ngelama tu sereta ulah ti manah ngagai BN enggau SUPP ngujungka ulih diterima mensia mayuh,” ku iya.
Iya mansutka penemu nya udah tembu ngulu aum ke diatur Presiden SUPP, Datuk Patinggi Tan Sri Dr George Chan begulai enggau 20 iku komiti ari pampang Engkilili ditu kemari.
Nitihka Sim, raban ari Engkilili ngenataika buah runding tang semua pemutus enggau pansik bepangggai ba Dr Chan enggau Jawatankuasa Kerja Pusat (CWC).
Taja pia iya enda nyakal sekeda raban ti bisi enda setuju Rayong masuk ngagai SUPP tang parti bebendar ngumbuk sereta meri jaku putus ngagai raban pemutus parti sereta ngagai semua raban parti nya.
“Kitai nadai nerima sukung 100 persin ari sida, tang enti tulihka majoriti nya udah manah,” ku iya.
Lebuhka ditanya enti kaban parti komponen BN ba Engkilili setuju nerima Rayong dalam SUPP, iya madahka:
“Kitai deka berundingka pekara nya enggau semua tuai parti.”
Ba pengawa ke bukai, Dr Chan madah Rayong siku ari orang ke siru BN laban kala nyadi kaban lalu enda kala nyakal BN.
2. Berita nya manah ngagai semua rakyat ba kawasan engkilili. Buat pertama kali 3 orang pemimpin begulai sejalai sama sekali dalam bejalaika pengawa. Enda dalam timpuh 25 taun ke udah, siko bekayuh ke ulu, siko ke ili...
No comments:
Post a Comment